Queirello(-de-la-cambo-basso)
Carex demissa
Cyperaceae
Àutri noum : Moutouso, Sagneto.
Nom en français : Laîche à tiges basses.
Descripcioun :La queirello-de-la-cambo-basso trachis en mato dins li palun tourbous de mountagno sus siliço. Fai partido dóu group di Carex pulèu pichot qu'an uno espigueto masclo e 2 à 6 espigueto femello. Èi proche de la meno lepidocarpa emé si fueio estrecho e sis utriculo sarrado emé un bè di dos dènt e rufe emé tres estigmate. Se n'en destrìo pamens que soun espigueto masclo èi pourtado pèr un pecou mens long que l'espigueto femello d'à coustat (fotò), que li bè dis utriculo soun pas torso e peréu que se trovo sus siliço pas sus cauquié.
Usanço :Couneissèn pas d'usanço particuliero pèr aquelo planto. Escriéure au site se n'en sabès mai.
Port : Erbo
Taio : 3 à 40 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo
Gènre : Carex
Famiho : Cyperaceae
Ordre : Poales
Coulour de la flour :
Verdo
Petalo : ges
Ø (o loungour) enflourejado : 5,5 à 8 mm
Flourido :
Estiéu
Sòu : Si
Autour basso e auto :
Pancaro entresigna
Aparado : Noun
Juliet à avoust
Liò : Palun tourbous
- Bas-palun
Estànci : Mountagnard à Aupen
Couroulougi : Anfiatlantico
Ref. sc. : Carex demissa Vahl ex Hartm., 1808
(= Carex viridula subsp. oedocarpa (Andersson) B.Schmid, 1983 )
Cardoun(-di-pecou-nus)
Carduus defloratus
Asteraceae Compositae
Nom en français : Chardon à pédoncules nus.
Descripcioun :Aquéu cardoun trachis en mountagno dins lis esboudèu o enca li tepiero roucaiouso. Fai de mato gaire sarrado d'ounte sorton de flour coumpausado pourtado pèr de pecou nus, valènt-à-dire sènso fueio, o quàsi, mai pelouso (fotò). Li bratèio soun pougnènto, pulèu longo e d'un cop estrecho. Dos meno iston au nostre mai tout acò èi pancaro bèn clar : la subsp. carlinifolius, aqui presentado, a un pecou que fai pas souvènt mai de 5 cm, alor que defloratus fai mai de 10 cm en generau. Pamens i'a d'intermediàri que ié dison la subsp. medius.
Usanço :Tóuti li cardoun soun manjadis, majamen li tijo, pamens avèn pas d'entresigne sus d'usanço couneigudo pèr lou cardoun-di-pecou-nus.
Port : Grando erbo
Taio : 15 à 80 cm
Fueio : alterno
Tipe bioulougico : Emicriptoufite
Cicle bioulougico : Planto renadivo
Gènre : Carduus
Famiho : Asteraceae
Famiho classico : Compositae
Tribu : Cardueae
Ordre : Asterales
Coulour de la flour :
Roso
Petalo : >6
Ø (o loungour) enflourejado : 3 cm
Flourido :
Estiéu
Sòu : Ca
Autour basso e auto :
Pancaro entresigna
Aparado : Noun
Liò : Esboudèu
- Roucaio
- Tepiero roucaiouso
Estànci : Mountagnard à Aupen
Couroulougi : Ouroufito-Sud-Ouèst-Éuroupenco
Ref. sc. : Carduus defloratus L., 1753